ट्रम्पविरुद्ध मुद्दा नचलाए अमेरिकासंग बदला लिन्छौंः इब्राहिम रइसी

काठमाडौं। इरानले जनरल कासिम सुलेमानीको हत्या अभियोगमा तत्कालीन अमेरिकी राष्ट्रपति डोनाल्ड ट्रम्पविरुद्ध मुद्दा नचलाए अमेरिकासँग बदला लिने चेतावनी दिएको छ ।

अमेरिकी सेनाको हवाई आक्रमणमा मारिएका सुलेमानीको दोस्रो वार्षिकीमा इरानका राष्ट्रपति इब्राहिम रइसीले सो चेतावनी दिएका हुन् ।

कासिम सुलेमानी कुद्स फोर्सको शीर्ष कमाण्डर थिए । ३ जनवरी २०२० मा अमेरिकाले गरेको ड्रोन आक्रमणमा उनी मारिएका थिए ।

उक्त आक्रमण तत्कालीन अमेरिकी राष्ट्रपति डोनाल्ड ट्रम्पको निर्देशनमा भएको थियो ।

सोमबार इरानी राष्ट्रपति रइसीले भनेका छन्, ‘यदि सुलेमानीको हत्या अपराधमा ट्रम्प र तत्कालीन विदेशमन्त्री माइक पोम्पियोमाथि मुद्दा नचलाएमा हामी हाम्रो शहरी जनरलको मृत्युको बदला लिन्छौं ।’