कांग्रेसबाट उम्मेदवार बनेका राईले माग्न थाले एमाले उम्मेदवारलाई भोट

काठमाडौं। भोजपुरको आमचोक गाउँपालिकाको अध्यक्षमा उम्मेदवारी दिएका कांग्रेस नेतृ भगवती राईले नेकपा एमालेका उम्मेदवारलाई समर्थन जनाएका छन् ।

कांग्रेसबाट उम्मेदवार बनेका राईले उम्मेदवारी फिर्ता लिन खोज्दा कांग्रेस र माओवादीका नेताहरूले ‘बन्धक बनाई’ फिर्ता लिन नदिएको आरोप लगाउँदै आफू निर्वाचन प्रचार र घरदैलोमा उपस्थित नहुने समेत जनाए ।

विज्ञप्ति जारी गर्दै राईले आफू उम्मेदवारका रूपमा मत माग्न असमर्थ भए पनि आफ्नो गाउँपालिका अध्यक्षमा एमालेका उम्मेदवार वसन्त राईलाई मतदान गर्न आग्रह गरेका छन् ।

‘नेकपा एमाले आमचोकसँग पार्टीको सहमति भए अनुसार अध्यक्ष पदका उम्मेदवार वसन्त राईलाई चुनाव चिन्ह सूर्यमा र उपाध्यक्ष पदको उम्मेदवार छिरिङ शेर्पालाई चुनाव चिन्ह रूपमा मतदान गरी अत्यधिक मतले विजयी गराउनुहुन सबै मतदाता समक्ष हार्दिक अपिल गर्दछु’, विज्ञप्तिमा उल्लेख छ ।

आमचोक गाउँपालिकामा स्थानीय कांग्रेस नेताहरूले एमालेसँग तालमेल गरेका थिए ।

कांग्रेसको जिल्ला नेतृत्वले एमालेसँगको तालमेल तोड्न निर्देशन दिए पनि कार्यान्वयन हुन सकेको थिएन ।

कांग्रेसभित्रको आन्तरिक विवादका कारण सो पालिकामा गठबन्धनको तालमेलमा समस्या उत्पन्न भएको हो ।